Украинд дайн эхэлсний дараа Финланд улс хууль бус дүрвэгчдээс хамгаалахын тулд ОХУ-тай залгаа хил дээрээ 200 км урт төмөр хашаа босгохоор болсон билээ.

Тэгвэл энэхүү бүтээн байгуулалтынхаа эхний хэсэг болох 3 км урт хашааг Баасан гарагт хүлээн авчээ.

Гурван метр өндөр, өргөст тороор хүрээлсэн ийм хашааг босгоход нийтдээ 380 сая евро зарцуулж байгаа бөгөөд 2026 онд бүрэн дуусгах юм.

Саяхан Финланд улс НАТО-гийн гишүүн болсноор тус цэргийн эвслийн Оростой залгадаг хилийн урт хоёр дахин нэмэгдсэн билээ.

Нийт хашааны 70 хувь нь Финландын зүүн өмнөд хил дагуу босох юм. Харин үлдсэн хэсэг нь төв болон алс умард хязгаарын хилийн шугамд хэсэгчилсэн байдлаар босох гэнэ. Гол нь хилийн нэвтрэх хэсгүүд болон тэдгээрийн ойр орчмыг хашихаар төлөвлөсөн байна.

Хашааны эхний хэсгийг дуусгахад нэг сар орчим хугацаа зарцуулжээ.